Contoh Geguritan Ngundhuh Ulam

Geguritan Nelayan

Ngunduh Ulem

Soroting netra donya ing wanci enjing cumplorot sisih wetan pernahe
Awak sayah, mripat digondheli rasa ngantuk
‘Anaku luwe, bojoku luwe, kendhilku nggoling’
pamikirku
Gregah, tak pancal rasa wegah

Gliyak-gliyak sikil jumangkah
Kumprubut nyekel gethek
‘Ayo . . .ayo. . .’
‘Sithik engkas’,
pangajaku nengahake gethek

Kringetku mancur
Awaku, klambiku klebus ginebyur kringet
Banyu asin awujud ombak ngapyuk ragaku sakanca
Gethek ora gelem manengah
‘Yo… yo… ayo…’
pangajaku

Plong, rasa jroning atiku
Huuh, pawetune napas landhung
Kapalku nengah ing papan panganku
Ombak pinggir segara tak kalahke dening gedhene tekatku sakanca
‘Kok ya mung semono karonsamu’,
batinku
Jala tak rangkul
Tak undhuh ulamku
‘Anaku, bojoku, sida mangan’
‘Kendhilku ora njomplang’
rasaku

Mongkog rasaning atiku
Luh tumetes kagirangan
Sukur tanpa pindhan kang dumadi saka rasaku

Dening: Yuniar Lang-lang Bawana